கர்நாடக மாநிலம் பெங்களூருவில் கடந்த சில மாதங்களுக்கு முன் தொடர்ச்சியாக வீடுகளில் நடைபெற்ற கொள்ளை சம்பவங்கள், போலீசாரை அதிர்ச்சியடைய செய்த நிலையில் இப்போது அதில் முக்கிய திருப்பம் ஏற்பட்டுள்ளது.

தொடர் விசாரணையில், புதுச்சேரியைச் சேர்ந்த மூவர் – ரகுராமன், நட்சத்திரம் மற்றும் ஜெயசந்திரன் – இந்த கொள்ளை சம்பவங்களில் நேரடியாகவும், மறைமுகமாகவும் ஈடுபட்டது கண்டுபிடிக்கப்பட்டுள்ளது. முதல்கட்ட விசாரணையில், முதலியார்பேட்டை பகுதியைச் சேர்ந்த ரகுராமன் மற்றும் அரியாங்குப்பத்தைச் சேர்ந்த ஜெயசந்திரன் ஆகிய இருவரும் பெங்களூருவில் நடந்த வீட்டு கொள்ளைகளில் நேரடியாக ஈடுபட்டிருந்தது தெரியவந்தது.

இவர்களுடன் சேர்ந்த நட்சத்திரம் என்பவர், கொள்ளையடிக்கப்பட்ட நகைகளை விற்பனை செய்யவும், அவற்றை அடகு வைக்கும் பணிகளை ஏற்பாடு செய்யவும் உதவி செய்துள்ளார்.

புதுச்சேரியில் வட்டி கடை வழியாக பணம் பரிமாற்றம்:
இவர்கள் கொள்ளையடித்த நகைகள், புதுச்சேரி பாரதி வீதியில் உள்ள ஒரு வட்டி கடையில் அடகு வைக்கப்பட்டு பணம் பெற்றிருந்தனர். இந்த தகவலை உறுதிப்படுத்திய கர்நாடகா மாநில போலீசார், அதே கடையில் திடீர் சோதனை மேற்கொண்டனர். சோதனையின் போது, கொள்ளையர்கள் 200 பவுன் நகைகளை அங்கு அடகு வைத்திருந்தது தெரியவந்தது. இதையடுத்து அந்த நகைகள் பறிமுதல் செய்யப்பட்டன. வட்டி கடை உரிமையாளர் மற்றும் ஊழியர்களிடம் போலீசார் விசாரணை நடத்தி வருகின்றனர். தொடர்ந்து, மூவரும் கைது செய்யப்பட்டனர். இவர்களில் ஒருவர் புதுச்சேரி சிறையில் அடைக்கப்பட்டுள்ளார். மற்ற இருவரை பெங்களூரு போலீசார் தங்களுடன் அழைத்து சென்றுள்ளனர்.

கர்நாடக போலீசாரின் திடீர் வருகையும் சோதனையும் காரணமாக, புதுச்சேரி பாரதி வீதியில் சிறிது நேரம் பரபரப்பு ஏற்பட்டது .

எச்சரிக்கை:
போலீசார் இந்த கொள்ளை சம்பவங்கள் தொடர்பான விசாரணையை இன்னும் தீவிரமாக மேற்கொண்டு வருகின்றனர். இது போன்ற குற்றச்செயல்களில் ஈடுபடுபவர்களை கண்டறிந்து, கடுமையான நடவடிக்கைகள் எடுக்கப்படும் என அதிகாரிகள் தெரிவித்துள்ளனர்.