புதுச்சேரி அரியாங்குப்பம் அருகே வீடுபுகுந்து 17 வயது மாணவியிடம் பாலியல் வன்கொடுமை செய்ததாக, பெங்களூருவில் சிற்பியாக பணியாற்றும் நித்தீஷ்குமார் (19) என்பவர் கைது செய்யப்பட்டுள்ளார்.

புதுச்சேரி வீராம்பட்டினம் சுனாமி குடியிருப்பை சேர்ந்த நித்தீஷ்குமார், விடுமுறைக்காக வீட்டிற்கு வந்திருந்த போது, அதே பகுதியை சேர்ந்த மாணவியிடம் நெருக்கமாக பழகி, காதலிப்பதாகக் கூறி வீட்டிற்குள் புகுந்து வலுக்கட்டாயமாக பாலியல் வன்கொடுமை செய்ததாக கூறப்படுகிறது.

இதுகுறித்து மாணவியின் பெற்றோர் அளித்த புகாரின் பேரில் அரியாங்குப்பம் போலீசார் நடவடிக்கை எடுத்து, போக்சோ சட்டத்தின் கீழ் நித்தீஷ்குமாரை கைது செய்தனர். பின்னர் நீதிமன்றத்தில் ஆஜர்படுத்தப்பட்ட நித்தீஷ்குமார், காலாப்பட்டு மத்திய சிறையில் அடைக்கப்பட்டார்.

இதே மாணவி கடந்த 2021-ஆம் ஆண்டிலும் பாலியல் வன்கொடுமைக்கு உள்ளாகியுள்ளார். பிறந்தநாள் கொண்டாட்டம் என்ற பெயரில், விடுதி ஊழியர் ஒருவர் மாணவியை தென்னந்தோப்பிற்கு அழைத்துச் சென்று பலாத்காரம் செய்ததாக வழக்குப் பதிவு செய்யப்பட்டிருந்தது. குற்றவாளி கைது செய்யப்பட்டு பின்னர் ஜாமினில் வெளிவந்துள்ளார். அந்த வழக்கும் தற்போது புதுச்சேரி நீதிமன்றத்தில் நிலுவையில் உள்ளது.

பெண்கள் மற்றும் சிறுமிகள் மீதான பாலியல் வன்கொடுமைகள் மீண்டும் மீண்டும் நடப்பது, சமூகத்தில் விழிப்புணர்வு மற்றும் சட்ட அமலாக்கத்தின் வலிமையை சோதிக்கிறது. குற்றவாளிகள் மீது விரைவான நடவடிக்கையும், பாதிக்கப்பட்டவர்களுக்கு உரிய பாதுகாப்பும் வழங்கப்பட வேண்டும். இதுபோன்ற சம்பவங்கள் மீண்டும் நடக்காத வகையில், பள்ளி மாணவிகளுக்கான விழிப்புணர்வு, பாதுகாப்பு நடவடிக்கைகள், மற்றும் கடுமையான சட்ட நடவடிக்கைகள் தேவைப்படுகிறது.